中環出更：開會電話響 張華峰甩轆熄唔到
手機不離手已經係現今社會嘅寫照，立法會議員開會時都難免要用電話，所以好多人都調校靜音模式，就唔怕影響人。不過，立法會議員張華峰（肥老闆）尋日開內務委員會時突然電話響，仲要熄極都熄唔到，甩晒轆。
響足十幾秒 畀隔籬位笑
話說內會期間突然傳出電話聲響，而且響足十幾秒，搞到主席李慧琼忍唔住提醒議員要將手機調校至靜音，仲勞煩工作人員去尋找聲音來源添。肥老闆就非常尷尬，雙手拎住電話喺枱下面撳咗好耐，但個電話就依然唔聽話，坐喺佢隔籬嘅議員劉業強都忍唔住笑。
肥老闆講番件事都覺得唔好意思，佢話愈心急愈熄唔到，仲賴部手機就嚟壞，睇嚟經過今次事後真係要認真考慮換新手機喇。劉業強就笑笑口抽水話，最佳解決方法係帶住手機行出會議室，不過佢擔心若肥老闆太心急行出去，跌親就仲大鑊喎！
卓妮