中環出更：晚宴量血壓 羅志光上壓160未驚過

羅志光解釋，自己原本就有高血壓，若唔食藥上壓高達一百九十，但食藥之後就控制得唔錯，一般喺一百三十左右。佢笑笑口話當日可能啱啱入場，未喘定氣，先至高番啲啫。佢仲話就算唔食血壓藥，都冇乜特別唔舒服，所以唔驚喎。

黃特平教飲紅酒保血管健康

喺澳洲有自家葡萄酒莊嘅博愛醫院前總理黃特平都有到場，佢自誇血管「好靚仔」，醫生話佢血管年齡好似三十歲咁後生喎，事關佢長年飲紅酒，而紅酒可以軟化血管。講咁多，不如即場檢測吓，結果數據真係「好靚仔」，所以佢奉勸大家飲多啲紅酒喇。

緬甸係出產玉石大國，當晚緬甸駐港總領事Wunna Han夫婦都係座上客，商會永遠名譽會長吳錦青、副主席何志生及副會長韓嘉軒等人都忙於招呼。現場仲有好多玉器專家，唔少人都趁機穿戴靚玉，羅志光及太太羅陳美金就戴住同款式嘅玉石蜻蜓襟針，好雅致。羅志光話個襟針名為「一品清連」，係佢自己設計。吳錦青就讚羅志光多才多藝，最近就同佢學習收藏玉器，仲話睇好玉石嘅投資前景，將來可望同鑽石及黃金一樣受投資者歡迎。

Wunna Han夫婦現身同業界歡聚，韓嘉軒（左一）及何志生（右一）幫手招呼。	吳錦青（左）係周年晚宴大會主席，黃特平（右）特登去撐場。	「一品清連」蜻蜓襟針。

卓妮