北京霧霾嚴重，有內地網民改編經典電影對白︰「世上最遠的距離，不是生與死的距離，而是我在街上牽你的手，卻看不到你的臉。」香港空氣污染情況或者冇咁離譜，但藍天白雲一樣咁罕見，空氣一樣咁污濁，睇吓周圍一個二個唔係鼻敏感就係久咳不愈，就知咩事。
可能有人會問，點解環保署每日公布空氣污染指數，大部分程度唔係「低」就係「中」呢？真相原來係當局為求粉飾太平，不惜喺量度過程中出蠱惑。尋日一個學術論壇上，美國北卡羅萊納州州立大學教授踢爆，本港部分空氣監測站嘅位置好有問題，好似元朗一個監測站咁，居然設喺一棟大廈嘅天台，根本無法反映真實嘅空氣質素。
係人都知，海拔愈高空氣愈好，否則就唔會咁多人走去行山，高層單位亦唔會貴過低層咁多。幾年前瑞士研究人員發現，地下至八樓嘅住客，死亡風險較高層住戶高兩成，其中患呼吸道疾病嘅比率更高逾三成，環保署空氣監測站「堅離地」，話唔係想取巧，三歲細路都唔信。如果咁都Work嘅話，不如索性將監測站搬去中環IFC頂層，再唔係搬去大帽山山頂吖，笨！
查實要準確量度空氣質素，唔係咁難。正如有學者指出，現時外國已有科技可按用戶位置，喺智能手機上顯示附近嘅空氣污染濃度，環保官僚咁簡單嘅嘢都唔做，非不能也，實不為也。
話時話，港產官僚點止監測空氣污染「堅離地」，直頭係逆潮流而動，大開歷史倒車。係人都知，電動車取代傳統燃油車係大勢所趨，發達國家陸續宣布禁售燃油汽車時間表，港府反其道而行，最近宣布取消電動車稅務優惠，問你死未！
有人形容當局坐視香港烏煙瘴氣，同「謀財害命」冇乜分別，真係一啲都冇誇張。先講「謀財」，據港大公共衞生學院前教授賀達理統計，淨係○四年至○九年期間，因為空氣污染引致嘅經濟損失，就高達一百二十幾億港元；至於「害命」，一五年因空氣污染而提前死亡嘅個案估計超過二千宗，而最諷刺嘅係，前面提到嘅賀達理教授，就係因為頂唔順香港嘅污濁空氣，搞到呼吸系統毛病惡化，一○年港大約滿後返英國祖家退休，冇幾耐仲與世長辭添。
所以話，官老爺點樣玩數字遊戲都係假，小市民就話焗住留喺度吸廢氣啫，老外自然識用腳投票。愈來愈多外企高管視派駐香港為畏途，加幾多津貼都冇勇夫，就係因為「條氣唔順」。近年本港無論喺競爭力抑或宜居城市嘅國際排名都跌跌不休，家陣知點解喇。