政情：梁卓偉中文「處女作」冇人幫手寫

港大醫學院院長梁卓偉尋日舉行新書發布會，呢本《大醫精誠》大有來頭，係梁卓偉首次用中文執筆嘅「處女作」，紀念港大醫學院今年一百三十周年。佢話撰寫過程都幾艱苦，兩年零九個月前先構思，本來諗住搵人幫手寫，點知搵咗半年都無人肯幫，佢惟有親自操刀，結果一寫就寫咗四百頁，成本字典咁厚。

梁卓偉推介其中一篇題為「最年輕的港大醫學院院長」嘅文章，原來最年輕嘅醫學院院長係一九一五年出任嘅英籍解剖學教授狄比，時年三十一歲，梁卓偉話自己出任時已經四十歲，大家一直誤會佢，佢只係「第二年輕」。

呢本書記錄醫學院嘅崛起史同演進歲月，由第一位醫科生革命英雄孫中山，香港爆發嘅大型疫症包括鼠疫、肺結核，以及近年嘅沙士，當中仲有唔少香港著名醫學家族故事o架！