政情：財會剪布有計工務人事兩小組留番低

早前分別有建制派同泛民主派議員提出修改財會會議程序議案，而為咗決定修訂程序，尋日就舉行閉門簡介會。陳健波話簡介會主要由秘書處講解諮詢文件，並就修訂會議程序方式作解釋，又話會喺本周六召開特別會議，若當日能夠通過，最快下月十六日可以討論修改會議程序。

修改會議程序望落有所進展，但陳健波估計屆時有唔少修訂，相信過程漫長。而佢喺上個立法年度曾講過，有需要探討重組工務小組同人事編制小組一事，據聞已經無咗呢回事喇！

被用作拉布 反增財會剪布說服力

根據立法會《議事規則》，財會轄下嘅工務小組同人事編制小組，用作協助審核政府提交嘅公共工程開支同埋更改公務員編制嘅建議，但兩個小組都冇獨立權責，其建議無法約束財會。不過，財會所審議嘅項目都會先交由工務小組同人事編制小組討論，所以項目去到財會時已有普遍共識，從而節省時間。然而近年拉布成風，議員喺兩個小組上不斷提問，項目交到財會時又繼續問，令到拉布更為嚴重，導致政府嘅撥款申請大塞車。

現時工務小組同人事編制小組嘅主席分別係盧偉國同葉劉淑儀。有建制派議員透露，雖然泛民經常將喺兩個小組發動拉布，但摺埋計劃已經胎死腹中，因為兩個小組能為財會擋一擋，好似陳健波主持會議時，都會提及問題已經喺兩個小組問過，更數埋喺當時討論咗幾耐，令到剪布時更有說服力，可以顯示有足夠嘅討論，所以直言有保留嘅價值。

曾考慮「摺埋」 恐「分贓唔勻」終放棄

另外，該名議員亦批評政府官員答唔到問題，認為設立兩個小組可以令到官員做定功課，避免去到財會時被問到口啞啞，若然冇咗兩個小組作為關卡，可能令到建制派喺財會時都會插埋政府一份添！再者，摺埋小組又會引發如何安排兩個小組主席嘅問題，為咗避免分贓唔勻都係維持現狀喇！

其實針對財會拉布問題，喺今個立法年度已作出唔少改動，好似主席指引已全面落實，將本身多節財會會議視作同一次會議、討論縮短表決鐘聲議案發言減至一分鐘等，而且建制派亦提交修改會議程序建議，即使唔摺埋兩個小組，相信都可以改善到財會拉布情況嘅。