中環出更:羅冠聰回魂立會 打尖講完即閃

立法會司法及法律事務委員會尋日就跨性別承認制度召開公聽會,唔少團體都派代表出席發表意見。因三年前衝擊政府總部東翼前地一案被判囚、早前獲保釋等候上訴嘅香港眾志主席羅冠聰回魂立法會,仲要打尖發言添!

公聽會討論跨性別承認制度

羅冠聰喺公聽會上話跨性別問題唔係石頭爆出嚟,又話一班心理性別與生理性別唔同嘅人,心入面有好大嘅痛苦,所以一班跨性別人士嘅自殺率同患抑鬱嘅機會比正常人多,叫政府着手處理呢啲問題。佢又話香港人嘅家庭觀念唔係咁薄弱,而且亦唔係單由一男一女去維繫,重點係愛,所以對社會上唔同嘅人都要有同理心。不過,睇嚟佢好趕,一嚟就要求第一個發言,一講完就即閃。

同場仲有工黨立法會前議員何秀蘭,今次亦係佢失去議席後首次出席立法會會議。佢喺公聽會上話自己係代表工黨嚟發言,支持跨性別承認制,而坊間好驚共用更衣室會有風化案或性侵問題,佢就話呢啲係個人品行問題,同跨性別或性取向無關係,政府整多啲獨立廁格同浴室就可以解決問題。

卓妮

第一手消息請下載on.cc東網iPhone/iPad/Android/Windows Phone Apps