中環出更：彈性安排工作日程 張雅麗唔會失去家庭
男主外、女主內嘅傳統觀念已經過時，好似商界中就不乏女領袖喇！不過，佢哋事業上成功，並唔代表就要放棄家庭，好似三子之母嘅香港島婦女聯會主席張雅麗（Carol）就話，會平均分時間畀屋企、事業同服務社會，以彈性時間去安排日程咁話。
早前有一個頒獎禮，以表揚多位傑出商界女領袖，除咗Carol外，「玩具大王」蔡志明太太蔡李惠莉、金紫荊女企業家協會執委沈貝嘉、曾獲青年工業家獎嘅徐詠琳等都同樣獲獎。Carol話每日都會早起身，把握囝囝返學前嘅時間，而工作方面亦會爭取早返屋企以多作陪伴，若然公幹過於頻密，就會選擇將工作帶返屋企做，果然要爭取機會同屋企人見面。
沈貝嘉六點前返家陪囝囝
Carol仲話要做到平衡全靠唔少人幫手，即使丈夫工作繁忙都會互相配合。另外，佢又話見到唔少成功女性後悔同子女疏離，所以佢時常警惕自己，直言唔想回憶中失去家庭呢部分咁話。
作為兩子之母嘅沈貝嘉都有類似平衡家庭同事業嘅做法。佢同樣會早起身爭取囝囝返學前時間去相處，而每日都要六點前返到屋企，再同囝囝一齊分享當日嘅經過。從事教育工作嘅佢更加話，見過有小朋友過於依賴家傭而成為港孩，所以當佢返到屋企，家傭就會自動行開唔介入佢嘅親子時間，而佢亦話唔少外國人都有同樣做法，所以寧願畀家傭每星期放多一日假喎。
蔡太就話當年自己喺幼稚園工作，可以同仔女一齊返學同放學，連假期都一齊放，所以當年可以平衡到工作同家庭，亦有時間照顧佢哋。佢仲話慶幸當年唔使去幫丈夫工作，否則就好難兼顧到兩者嘞！
卓妮