中國人劣根性多如牛毛，乘人之危大發災難財係其中之一。譬如有人唔好彩跌落水浸死，家屬好多時都會被索取高價「撈屍費」，不過比起貪官「發死人財」咯喎，呢啲只係小巫見大巫，仲話建立「富強文明」嘅強國，搞笑啲啩？
好似導致七萬人死亡嘅四川汶川大地震咁，雖然事隔九年有多，但貪官將賑災款項中飽私囊嘅醜聞，仍然不絕於耳。最新一宗涉及山東省援川指揮部一名官員，佢被指夥同四川一名商人，以虛假收據同發票，套取援建資金超過一千萬元人民幣，其中涉事貪官仲幫助其他三間企業申領援建補助資金，並從中收取好處費，結果官商二人同被判處十一年有期徒刑。
有人形容今次係一宗貪官發「國難財」嘅惡劣事件，但計功夫茶話齋，當年汶川地震死傷枕藉，國人發揮一方有難，八方支援嘅精神，而政府嘅援建資金，實際上亦係老百姓嘅民脂民膏，貪官竟然夠膽將黑手伸埋嚟，直頭同「發死人財」、食人肉饅頭冇乜分別，莫講話判十一年，即使判終身監禁甚至殺頭，都不足以抵銷佢哋嘅罪孽。
話時話，類似賑災款項被挪用嘅醜聞，今次只係冰山一角。有人計過數，當年全國為汶川大地震籌得超過六百億元人民幣捐款，打破歷年紀錄，但至今仲有五百億元捐款流向成謎。只要睇吓時不時傳出捐建工程偷工減料以至豆腐渣工程，部分學校建成後唔係空置餵蚊，就係淪為廢品收購站，唔使問阿貴，善款梗係畀班貪官同奸商袋袋平安。內地網民揶揄「窮人為富人捐款，等於戴山寨手錶嘅人為戴百萬名錶嘅人捐款；係揦住人造革皮包嘅人為提愛瑪仕嘅人捐款；係食飯盒嘅人為飲茅台嘅人捐款」，可謂一針見血。
呢方面，香港人絕對感同身受。當年港府同市民慷慨解囊，分別捐出逾百億港元，結果港府有份資助興建嘅一間中學，啟用唔夠一年就被徵地改建為地產項目。至於仲有幾多善款落入貪官荷包，真係冇人話得埋。年前有傳內地官員利用賑災款項來港大手掃名錶，仲慌死冇人知咁款，一袋二袋現金交易，雖然傳聞未經證實，但你問十個香港人九個都會信。鬼咩，做善事被人當羊牯，係人都心淡，港人對捐助內地自然災害熱情不再，就係咁解。
之所以搞成咁，國家監管機構不力，難辭其咎。除咗賑災款項被挪用，扶貧經費亦淪為貪官嘅提款機，之前有地方大鑼大鼓「熱烈慶祝」成為國家級貧困縣，就係咁解。國家領導人經常強調反腐「零容忍」、「無死角」，劣吏從賑災款項上下其手，無理由成為「燈下黑」o架，吓話？