香港一屋難求，早前有非牟利團體推出「共享房屋」計劃，邀請立法會議員田北辰（田二少）、鄺俊宇（Roy）等人試住一晚，兩人共度一宵後，Roy最近竟然喺立法會開會時爆田二少當晚喺共享房屋沖涼時整塞咗個廁所，仲話唔知點解沖個涼可以搞成咁。田二少就話，當晚咁多個人喺度望住佢，搞到佢係咁意都要通下個渠、拖兩拖個地。
田二少透露，今次係應社區組織協會何喜華邀請參與，何喜華仲話有工程公司特登搵佢，開價三十萬元包全屋裝修，該公司更自稱良心公司，點知佢哋一去住時就搞成咁。
田二少話，自己當晚猜贏咗第一個去沖涼，明明喺屋企慣咗開好細水，唔明點解個渠會塞，質疑裝修工程偷工減料，據報何喜華當晚上去睇「災情」後都好尷尬。田二少話，今次事件證明咗住共享房屋，點樣同同屋者協調都係一個難題喎。