政情：醫生資歷互認論捱轟梁卓偉喊冤
政界人士嘅一言一行都要小心謹慎，一旦惹來誤會或聯想，隨時被炮轟圍攻至體無完膚，今次捲入爭議嘅係港大醫學院院長梁卓偉，話說佢接受多間傳媒訪問，當中有報道引述梁稱，「希望本港醫生嘅專科資歷可以喺幾十年後同內地資歷互相認可」，就係呢個疑似醫生資歷互認論，惹來醫學界強烈反彈，炮轟梁想「中門大開」引入內地醫生，連執業試都慳番。梁卓偉遭到業界同路人炮轟大半日，傍晚透過港大醫學院指對有關言論產生誤會表示遺憾，之不過負面觀感印象已經造成，究竟業界對梁卓偉喊冤係受害人收唔收貨，相信每人心中都有一把秤可作出判斷。
前線批評言論自招嫌疑
據知內地醫生嘅專科資歷架構依家同香港無法銜接，目前一定要通過本地兩間醫學院舉辦嘅執業試先可以來港行醫，因此，呢個疑似醫生資歷互認論曝光，據聞唔少醫生喺手機群組一面倒鬧爆梁卓偉，其中前綫醫生聯盟副主席蕭旭亮批評，梁揀喺醫委會改革呢啲敏感時刻發表呢啲言論，好易惹人誤會︰「雖然幾十年後發生咩事無人知，但（梁）使唔使咁快投誠呀？」
梁公開當日訪問圖降溫
眼見業界反應群情洶湧，梁卓偉傍晚透過港大醫學院向傳媒發放訪問當日嘅對答試圖為事件降溫，據該對答內容，梁卓偉當時係話本港專科醫生，「四十年、五十年之後，資格是否也能夠得到內地認可呢？即是說，在香港考一套試，海外認可、香港自己本身當然認可，內地也認可。」佢其後補充指，「絕對不是說我們現在做的工作，就讓內地醫生來香港。這不是我的決定。」
雖然梁卓偉明示暗示無發表過類似醫生資歷互認論，不過醫學界唔理真假都有咁大反應，係因為業界一直非常憂慮醫委會改革，會降低招收內地醫生來港嘅執業門檻，據報梁卓偉有份拍心口話會做好把關，要求非本地醫生來港前一定要通過執業試，叫市民可以放心，可惜，今次涉及醫生資歷互認嘅言論被炒熱，再次觸動醫學界嘅神經，如果火燒連環船，影響埋稍後捲土重來再向立法會闖關嘅《醫生註冊（修訂）條例草案》，就真係認真無辜嘞。
對於本港醫生嘅專科資歷將來會否與內地接軌，食物衞生局發言人接受查詢時冇正面回應，只係重申醫學專科訓練係由香港醫學專科學院負責評核，並認可及頒授專科資格。