中環出更：卿姐去信力數國泰三宗罪
因管理不善於最佳航空公司排名榜節節下跌嘅國泰航空，數日前突然取消由以色列返港航班，受影響嘅乘客包括前立法會議員劉慧卿（卿姐），佢狠批國泰安排差，「激到你跳舞」，最終要滯留以色列兩天後才返港。卿姐正式去信國泰力數三宗罪，包括未能以積分換領機票、滯留以色列事件、以及國泰飛機餐質素差，佢希望國泰能全面調查事件，確保日後不會再發生同類事件。
滯以色列 斥安排差
卿姐於信中詳細講述滯留以色列事件嘅來龍去脈，合共提出三項投訴。佢透露，自己係國泰航空馬可孛羅會會員，十月計劃到以色列時，欲以積分換取機票但被拒，最後花錢購買機票，上機之後才發現機上尚有大量空位。佢續指，有些人未必能夠喺較早時間確定行程，依家以積分換取機票制度，對呢類人士並冇帶來好處。
卿姐其後再詳細憶述數日前於以色列特拉維夫滯留經過，批評國泰冇及時宣布航班取消、冇回應乘客需要，並指所提供嘅一百五十美元購物券係微不足道，不足以補償乘客。佢又提及，當傳媒廣泛報道今次事件後，唔少人反映對國泰嘅不滿，甚至形容佢嘅遭遇係冰山一角，佢希望國泰小心處理事件，以挽回市民信心。
卓妮