中環出更：李鋈發食素一年 道長考試如願過關
消費者委員會與食安中心早前化驗市面一批港式小菜樣本，發現多款港人經常點選嘅小菜都屬高鹽或高脂，不過話雖如此，其實飲食習慣都係因人而異，博愛醫院副主席李鋈發早前出席活動時自爆已經食素一年，因為佢許願祈求通過道長考試，以便加入嗇色園做會員。經過一年來讀書、考試，終於如願以償。點解咁誠心？因為佢自細拜黃大仙囉！
香港餐飲聯業協會（餐飲聯）主席李遠康旗下茶餐廳集團早前舉行五十周年慶祝晚宴，近千人齊歡聚。茶餐廳係港式飲食文化嘅代表，其中奶茶更加係擁躉滿天下，李遠康形容，以前絲襪奶茶係有錢人先至飲得到，依家就變成平民飲品。
魏麗霞為健康 轉飲熱奶茶
來自北京嘅身心美慈善基金副主席魏麗霞（Lisa）都話，廿幾年前佢啱啱落嚟香港時就鍾意咗飲凍奶茶，後來知道飲凍嘢無益，就改飲熱奶茶喇！
本身係上市家品集團主席嘅Lisa又憶述，早年移居香港冇耐時，就獲拍檔邀請一齊經營家品零售店，佢諗番當時店舖隔籬梗有一間茶餐廳，所以幾乎日日飲凍奶茶，仲笑稱當年係食極唔肥。
中華總商會常董方文雄、交通安全隊副總監梁青華、餐飲聯會長陳永安等人都有到場。出晒名識飲識食嘅梁青華近排就愈食愈瘦，事關佢日行一、二萬步，年幾以嚟已瘦咗三個碼，開心晒。
不過講到開心，都唔夠最近成功領養退休警犬Murphy咁開心。梁青華話佢等足兩年，先至等到呢隻啱啱退役嘅拉布拉多犬，佢笑稱Murphy係個「肥妹」，醫生提醒唔好再畀佢肥落去，所以嚟緊要多啲帶佢出去做運動喇！
卓妮