潮流興環保，反對派政客更係開口節能、埋口保育，不過咪睇佢哋好似環保達人咁款，查實最浪費資源嘅正正係佢哋，淨係喺立法會拉布咋，已經唔知浪費咗幾多燈油火蠟喇。
呢嗱，尋日立法會續會審議《能源效益（產品標籤）條例》決議案，明明毫無爭議，明明大部分議員都表態支持，點知反對派為咗拖延時間，竟然又使出怪招拉布，派出人民力量嘅陳志全做「箭靶」提出中止待續議案，再由反對派「戰友」輪流炮轟，仲要每人用盡十五分鐘發言時間，結果呢場大龍鳳再次得米，成功拖延會議超過四粒鐘。
醉翁之意不在酒，反對派之所以整色整水，當然唔係關心能源效益條例有冇不足之處喇，而係為咗隊冧整個立法會流程，務求一延俱延，將建制派提出嘅修改議事規則拖到出年三月補選「齊腳」之後先至進行，咁佢哋就有機會否決嘞。睇到喇，反對派為咗一己之私，連環保條例都要讓路，有冇再離譜啲吖？難怪建制派議員情緒激動，鬧爆反對派「扯貓尾」、「變態」喇。
有人就講得啱嘞，反對派平時滿口仁義道德，扮晒環保鬥士，其實只要佢哋拉少啲布、流少啲會，已經慳番好多水電冷氣，咁至係真正愛護地球吖嘛。不過又冇乜好奇怪嘅，反對派出於不可告人嘅政治目的，莫講話環保呢啲咁「高大上」嘅問題可以犧牲，就算係市民搵錢餬口咁現實嘅問題，佢哋照樣打爛人哋飯碗而面不改容。唔係咩，淨係上屆立法會咋，點人數已經點咗一千五百次，耗費二百幾粒鐘並造成十八次流會，搞到工程延誤又超支，最慘係工人有工冇得開，生計成問題，你話係咪冇陰功吖。
再講吖，反對派為咗拉布，連平時掛喺口邊嘅新聞自由都肆意踐踏，趕記者出議事廳都夠膽死，仲有乜嘢做唔出喎。你知喇，拉布不嬲被反對派視為阻礙政府施政嘅「核彈武器」，係又拉唔係又拉，萬一被建制派「剪布」廢去武功，佢哋玩完都似。事關生死存亡，陳志全「犧牲小我」只係碎料咋，更多花招怪招茅招肯定陸續有來，可憐係香港競爭力跌跌不休，時間喺吵鬧聲中虛耗，再咁落去，怕且好快就連內地二、三線城市都不如咯。
唔想咁樣，可以點樣呀？家陣市民未能「Vote Them Out」，修改議事規則就係當務之急。正所謂，你做初一，我做十五，既然反對派玩嘢玩到走火入魔，一日到黑阻住地球轉，建制派亦唔需要畀面，趁着人數佔優，一於人多蝦人少，快快趣趣剪布吖，唔該！