政情：「議會陣線」未成立 先甩轆玩殘自己
立法會非建制派中，有民主黨、公民黨和專業議政三大板塊，自決派朱凱廸、人民力量陳志全（慢必）等四名「單頭」議員決定另起爐灶成立「議會陣線」，仲原定喺尋日下晝三時舉行記者會宣布成立，但未成立就甩轆，要取消記者會，改為喺立法會「咪兜」宣布成立。點解搞成咁？咪就係自己玩殘自己囉！
等極唔齊人 取消記者會
立法會尋日繼續審議《能源效益（產品標籤）條例》嘅決議案，非建制派又玩拉布，慢必更提出中止待續議案，而建制派臨近下晝三時陸續發言，當時慢必要留喺會議廳等待作表決前嘅總結而未能出席記者會，約半小時後，佢哋取消記者會，趁慢必有空檔先喺「咪兜」發布。慢必玩嘢，累埋自己友。
等齊人之後，佢哋分別手持「議會陣線」四字，宣布組織成立。慢必話現時民主派有唔少黨派只有一位議員，希望團結「單頭議員」，亦希望喺補選後繼續邀請民主派議員加入；毛孟靜就話暫時出任召集人，強調組織並非政黨，唔會派人參加選舉。