政情：表演場地不足 馮海容 黎穎瑜 遭藝團圍攻
本港藝術場地不足及支援唔夠，一向都衍生唔少問題。民政事務局局長政治助理黎穎瑜（Jade）同商務及經濟發展局局長政治助理馮海容（Elizabeth）日前出席藝術行政人員協會嘅一個講座時，被多個藝團圍攻本港場地不足等問題，兩個政助一個就承認可能要改例，一個就話有責任開拓表演場地，但好多場地問題都關其他局事喎。
多個音樂團體同劇團都喺講座上批評搵唔到排練及表演場地嘅問題，又直指唔少資助都用咗嚟交租，資助又冇增加等問題。Elizabeth就承認唔單止表演，初創企業都面對場地問題，承認當年制訂相關政策係非常保守，新一屆政府點樣提供協助就要考慮行政手段或研究修改法例等可行性，明白初創企業同文化機構等都面對場地、租金等問題好大壓力。
Jade就話當局對開拓表演場地係責無旁貸，但係人流多咗就會有消防問題，呢個問題就由保安局負責，其他安全層面、地契限制就係發展局負責，當局成日都問教育局有冇得用下啲空置校舍，但流轉需時，而且個個局都吼住，依家構思下年度畀資源現時使用中嘅校舍，以提供文化藝術場地。