政情：拉布九唔搭八 民主派「忽然環保」

立法會大會最快下月六日可審議修改議事規則嘅議案，早前喺政府提出就高鐵一地兩檢方案嘅無約束力議案期間，民主派出怪招，引用回歸以來冇用過嘅議事規則嚟拖延，而喺相關議案日前獲通過後，佢哋尋日喺審議《能源效益（產品標籤）條例》決議案期間「扯貓尾」，慢必提出中止待續議案後，民主派就乘機發言拉布，佢哋大多用盡十五分鐘嘅發言時間，但係部分發言內容相當離奇。

能源標籤扯到火山爆發

好似一舊雲咁就好離譜，明明講香港實行能源效益產品標籤，但係佢就講到去全球暖化，繼而仲扯到火山爆發對大氣層有咩影響，又話乜嘢太陽活動係人為影響唔到；相對起嚟，李國麟就誠實得多，直認發言係「項莊舞劍」，目的只係要拉長審議過程。

眼見議會時間一分一秒過去，喺中止待續議案討論咗四個鐘後，象哥忍不住發言反擊，指當日條例小組委員會討論能源效益產品標籤時，成隊人一心支持環保，逐項電器研究，點知呢份心血就因為反對派嘅鬧劇被拖住。象哥更批評慢必出嚟做靶，然後全世界攻擊佢，形容「係變態嘅行為」。由於象哥發言激昂，佢嘅黨友蔣麗芸喺中途提醒佢唔好太激動，又叫佢小心血壓，但象哥就唔收火，話「唔發火當我病貓」。

另一黨友陳克勤亦話唔會猜測泛民主派議員突然關心環保嘅動機，又話如果議會可以少啲拉布，就可以慳番啲電同冷氣，咁先係環保。議員梁志祥直指慢必係拉布猛將，任何會議都會拉布點人，令市民覺得立法會係垃圾會，自由黨嘅邵家輝亦批評民主派拉布係「司馬昭之心，路人皆見」。中止待續議案傾咗六個鐘後被否決，至於決議案最終喺尋日大會休會前獲表決通過。搞咗咁耐，睇嚟負責嘅環境局局長黃錦星真係一額汗喇。