中環出更：鄭松泰議辦被貼「龜公泰」大字報
立法會議員鄭松泰位於青衣長亨邨嘅議員辦事處是非不斷，繼啟用初期被房署還原外牆壁畫後，尋日下晝又畀人喺議辦門口貼大字報，直鬧係偽君子係「龜公泰」、仲爆粗鬧佢係「×街」同騙子，要求政府快啲立案調查咁話！究竟發生乜嘢事？要點處理？鄭松泰就話無處理嘅需要，因為唔識貼紙嗰個男人喎。
鬧爆「推三推四是騙子」
話說有本報讀者尋日下晝經過鄭松泰嘅議員辦事處，見到辦事處外有幾個人圍住，原來係有一個着拖鞋、短褲、T恤同戴口罩嘅男人喺議員辦事處外牆貼大字報，寫到明「你個偽君子鄭松泰（龜公泰）當日選（舉）口號話會盡心盡力幫市民，現在市民有事找你幫手推三推四，你這樣是騙子」，而旁邊另一張紙就寫住「市民有冤無路說，希望政府可以立案調查條×街」。
卓妮