中環出更：總理嫁女 鄧國樑雙十一投得好女婿
十一月十一日「四條一」一向被戲稱為「光棍節」，近年就被炒作為購物節。今年雙十一適逢吉日，城中好多嫁娶喜事，仁濟總理鄧國樑都揀咗呢日嫁女。新外父鄧國樑講笑話應節，話當日個個都在網上買嘢，佢都投到個好女婿返嚟喎，引到台下賓客哈哈大笑。
仁濟董事局及仝人空群而出，唔講仲以為係仁濟嘅大派對添！最有趣係同鄧家一樣住喺大埔某別墅嘅名人齊出動，好似開業主大會咁齊人，包括香港福建同鄉會永遠名譽會長莊哲猛同太太駱英英（Jenny），仲有仁濟副主席王賢訊同太太Vincci都係老街坊，王賢訊精靈可愛嘅三歲囝囝Eason仲做埋花仔。
乖女傳戀聞 莊哲猛夫婦緊張
Vincci解釋，話新娘Jennifer睇住自己個仔大，兩人好有緣分，感情好好，就算同新郎哥William拍拖都帶住Eason一齊，所以大姐姐結婚，Eason自然係做花仔的不二人選喇！王賢訊就話見到好友結婚就諗起自己幾年前結婚，眨吓眼已經有三個仔女，時間真係過得好快。
講起結婚拍拖，梗要問吓莊哲猛同Jenny有關佢哋細女莊莎娜最近被爆有娛樂圈男友一事，Jenny講番件事仲係「驚魂未定」，事關佢當日未睇到報紙前就收到好多朋友電話，嚇咗一大跳，即刻拍囡囡房門問清楚，結果個女話冇件咁嘅事，佢先至放心。
Jenny一直對細女嘅婚事好緊張，希望佢快啲搵到適合嘅結婚對象，佢仲開出未來女婿嘅條件，話最緊要人品好，但最好就唔係娛樂圈人喇！莊哲猛就話最重要係兩人有緣分咁話。
卓妮