政情：張國鈞助友證婚 立會響鐘趕餐飽
最近立法會審議致謝議案期間，雖然點算法定人數嘅次數大減，令緊張嘅會議氣氛稍為緩和，但係都不容有失，尤其係身兼行政會議同立法會嘅議員就更加要坐定定，之但係張國鈞（Horace）竟然趁空檔走出立法會為朋友做證婚喎。
離律師樓幾分鐘路程
其實由政務官組成嘅「狗仔隊」經常駐守立法會出入口，令議員增添唔少壓力，而Horace當日喺響鐘期間返到立法會，見佢咁行色匆匆，做乜呢？佢話律師樓距離立法會只有幾分鐘路程，事關佢一早就約好做證婚，而且好友結婚嘅日期同時間都經師傅擇過，所以無法改期。好彩立法會暫時休戰，否則佢都幾難甩身去做證婚嘞！
Horace話唔可以離開立法會太耐，所以證婚後嘅手尾就交由秘書跟進，但佢講明無因為趕開會而令證婚工作偷工減料，因為證婚唔需要花太多時間，主要都係叫雙方讀誓詞、交換戒指等，但有時都要做埋司儀工作，好似要叫新郎新娘合照、錫錫等搞吓氣氛咁囉！