政情：泛民「真溝通」 講一套做一套

李飛邀議員交流 泛民多拒出席

早前中央負責港澳事務嘅主要官員有人事變動，白鴿黨主席胡志偉已經率先講明，如果關於香港政治制度嘅問題，白鴿黨會用盡一切方法，同中央及有關部門表達意見。但係今次李飛嚟香港，胡志偉就話都係得個聽字，有冇邀請都唔去啦，仲扮嘢用普通話講「聽我講話」；而佢嘅黨友尹兆堅就講明自己冇收到邀請，就算有都要諗吓，又話「大家都知喇，呢啲交流係訓話」，想知意見大把渠道，甚至睇立法會發言都知乜嘢取態，但佢臨尾都兜番句「我哋溝通大門常開」。乜原來咁樣叫用盡一切方法表達意見，睇怕係用盡方法逃避溝通先真。

藉口多 稱會議單向難表達意見

公民袋黨魁楊岳橋就話收到邀請o架，但成個黨都唔會去，話同類型嘅會成日都有喇，去都無得反映意見嘅，剩係得李飛喺度講，無佢哋講，咁睇新聞都知講乜嘢喇！

另外，人民力量陳志全就話無收過邀請；自決派朱凱廸就連有冇邀請都唔知，但講明有都唔去，話個會太單向性；工黨張超雄就話嗰日有大會，返立法會開會係議員責任喎；會計界梁繼昌就話仲諗緊，不過都大約知道會講咩o架喇；街工梁耀忠同香港本土毛孟靜都耍手擰頭講咗唔去，得番教育界葉建源會去聽。

乜嘢叫做真溝通？當人哋唔睬你，班泛民就嘈嘈閉話要溝通，依 家李飛來港，有機會溝通嘞啩，佢哋就擺姿態，咁樣就算重啟政改係真心，溝通都係假意喇！