中環出更：鄺美雲認參選人大 多朋友支持
全國港區人大代表喺十二月中旬換屆選舉，而珠海社團總會會長鄺美雲尋日喺就職禮中話，喺十幾日前開始考慮參選人大，對今次參選有信心，但會以謙卑嘅心希望服務社會。佢又話正式參選希望得到所有人支持，依家開始收集提名，亦得到好多人鼓勵出選。
最重要係做好自己
佢又話依家唔知有乜嘢人參選人大，但承認自己認識好多中聯辦嘅朋友，好多人都祝福佢，但唔敢講係邊種祝福，又認為最重要係做好自己。
對於國歌法係咪應該有追溯力，鄺美雲話港人須有身份認同，認同自己係中國人，國旗同國徽法已完成，相信國歌法亦能做好，又相信港人都唔會噓外國國歌，大家應以包容同尊重嘅態度對待自己嘅國家。至於應否有追溯力，佢認為應該喺國家層面同立法機構慢慢斟酌。
對於外界盛傳香港青年聯會前主席范駿華亦有意競逐人大一職，佢表明會繼續積極爭取參選人大，會以平常心去嘗試，但佢亦坦言「唔得嘅機會好大，唔得就唔得，今年三十九歲啫。」
卓妮