中環出更：旅行社遭勒贖議員業界齊發聲
最近有旅行社電腦被黑客入侵兼且勒索，搞到要報警求助，事件引起大家對網上資料保安問題嘅關注。旅遊界議員姚思榮話，今次事件對業界會起到警惕作用，但相信唔會影響市民參加旅行團嘅信心，因為始終都係個別事件，而且市民唔經旅行社訂購機票同酒店，亦同樣有機會遇上同類事件。
立法會議員林健鋒旗下有專門為商務客訂購機票同酒店嘅業務，但佢就唔擔心遇上同類事件，因為客人數目無旅行社咁多，而且全部都係熟客，直言一旦電腦開唔到，都可以靠人腦去運作喎！
黃進達盼行家提升網上保安
香港旅遊業議會主席黃進達（Jason）都話，今次咁大件事都係第一次見，依家網上科技嘅應用好普及，愈嚟愈多個人資料擺咗上網，所以一定要多啲提防。佢話業界已經舉行多次簡介會，希望提醒行家提高保安意識，同時介紹咗一啲科技公司畀大家，希望業界認真研究提高網上保安程序。至於自己嘅手機資料點樣保護，Jason就話除咗設定密碼之外，最緊要有備份，咁就唔怕被勒索或丟失手機後慌失失喇！
資訊科技界議員莫乃光話，雖然不時有個人資料外洩事件發生，但IT界嘅工作量未見大增。佢話，好多呢類事件都同使用無更新或過時系統有關，但呢類事件難以防範，只要使用網站購物就有機會遇上，故此佢建議銀行要加強認證，以減低客戶遭盜用身份嘅機會。
姚思榮趁機呻話，今時今日嘅旅行團生意好難做，發展冷門航線係出路之一，仲可以吸引到退休同中產人士添。
卓妮