全國人大常委會啱啱通過將《國歌法》納入《基本法》附件三，本地立法估計需要一年時間，各界擔心港獨分子趁住「空窗期」無王管搞事，果不其然，尋晚港隊主場友賽巴林，呢班偽球迷又肆無忌憚狂噓國歌嘞。
嗱，香港足總今次都算學精咗嘅嘞，球迷入場前實行嚴格檢查，禁止攜帶港獨標語進場，又加強勸喻球迷唔好搞事。之但係標語易擋，把口難防，有人係都要噓國歌咯喎，真係撳都撳唔住。即係咁，今次香港足總將受到乜嘢懲罰，仲要睇過至知，但之前試過被國際足協兩次罰款就係人都知，重犯肯定有更重罰則，隨時閉門作賽都似。黑狗搶食，白狗當災，部分球迷搞事，受懲罰嘅係香港足總及代表隊，呢班人到底係愛港定害港，仲使問嘅。
講嚟講去，都係香港長期被放縱惹的禍。唔係咩，過去中央一直錯將五十年不變當成五十年不管，任由港英餘孽洋奴漢奸為所欲為，將兩制凌駕一國，加上三年前佔領之亂爆發，「違法達義」歪風洗咗整整一代人嘅腦，港府拉人仲要歎慢板，黑手及搞手至今逍遙法外，卒之搞到港獨甚囂塵上。呢，噓國歌嘅背後理念咪又係「香港唔係中國」囉，咪又係港獨思潮作祟囉。
家陣中央係就係撥亂反正，強調全面管治權，仲將侮辱國歌行為刑事化，弊在港府出名廢柴無能，畏首畏尾，既唔敢設立追溯期，又講明立法前唔會執法，反中亂港分子仲唔趁機搞搞震至奇喇。咪畀功夫茶批中，空窗期無法可依，亂象叢生就梗嘅嘞，但即使《國歌法》成功立法，亦唔等於一天光晒，事關執法先至係最大挑戰。呢嗱，國旗法一早就有喇，但立法會議員鄭松泰倒插五星旗，法庭只係輕罰五千蚊咁大把，同變相鼓勵冇乜分別，將來執行《國歌法》會唔會重蹈覆轍，你話呢？
講真，噓國歌根本就好無謂，噓完之後太陽照常升起，國家依舊強大，對其他人冇任何影響，唯獨整衰自己隊波，呢啲咪叫自己玩死自己囉。香港足運本來已經不振，萬一真係因為噓國歌而被罰閉門作賽，更係雪上加霜，何必咁樣靠害？再講吖，香港背靠祖國，近水樓台，本來有大把世界，偏偏部分政客心懷不軌，部分年輕人又冥頑不靈，係都要自己搞死自己，佔中係咁，阻撓一地兩檢又係咁，香港想唔沉淪都唔得喇。
點都好，《國歌法》本地立法事在必行，爭在港府肯唔肯有法必依，執法必嚴啫。如果港府唔敢挺直腰桿處理港獨問題，唔好話國歌立法，二十三條立法都係嘥氣嘅咋！