政情：林超英為委員會拉客 笑聲吸「青」

環境運動委員會主要係組織啲環保活動，以及同本地非牟利機構推行環保教育及有關嘅小型工程項目等。林超英尋日喺社交網站Facebook貼文，話委員會期待年輕朋友報名，仲叫年輕人唔好等添！

自言「可能係最好玩」嘅委員會

有乜嘢賣點先？林超英形容呢個委員會可能係最好玩嘅政府委員會，開會常有笑聲，除咗提出意見同觀察所得，仲有機會審批項目、參與前線宣傳活動等，仲話「可以令你很忙但有意義。」唔知林超英係咪驚一般諮詢委員會好嚴肅，怕班年輕人覺得悶蛋冇興趣，所以用「可能係最好玩」同「開會有笑聲」做噱頭，吸引班年輕人。

其實依家都唔知有幾多人會申請加入呢個委員會，但林超英已同班年輕人講，「就算今年沒選上，也讓我們認識你，明年年底換屆時多些選擇。」果然識得為未來打算。