政情：鄧家彪倡購物城豁限奶令 象哥鬧「癡人說夢話」
港府講明要就限奶令進行檢討，嚇到市民勁驚青，會唔會全面撤令又要捱貴奶粉。工聯會嘅立法會前議員鄧家彪尋日去政府總部示威，強調限奶令唔能夠退，仲建議不如將進出口界議員黃定光（象哥）個新田購物城變豁免區，畀內地居民喺嗰度買咪得囉，但再追問點樣買，佢就冇講清楚，仲即刻澄清呢個只係佢個人建議喎。而平時經常喺立法會「閉目養神」嘅象哥，一聽到就即刻醒晒，仲話「佢傻啫，呢個建議係癡人說夢話」，佢先唔會理啊！
象哥就話當年點解要搞限奶令，就係因為內地奶粉有三聚氰胺，搞到內地人去全世界度搶奶粉，然後啲奶粉供應商就企圖囤積貨存，再提高個價，咁零售商就扣起啲平價貨，到加咗價先推番出市場賣，咁就有得賺啦！所以佢話當年已同政府建議，應該將奶粉同大米一樣，要納入《儲備商品條例》，要班供應商保留存貨，咁就唔使搞限奶令啦！
象哥鬧爆政府唔檢討
象哥慨嘆，當年事態緊急，如果要審埋納入條例就有排搞，所以先整個限奶令出嚟，點知政府幾年都唔檢討吓，佢直情鬧「依家撤唔撤限奶令，政府最清楚！」
