政情：眾志內亂 黃之鋒清門戶 掃走林淳軒

眾志於尋日下晝三時許透過Facebook，發表名為「香港眾志就林淳軒職務及黨籍之聲明」，指林淳軒違反黨內財政處理程序，經確認無財政損失，而黨內調查後裁定林淳軒違反黨員之行為操守，即時免去常委職務。

林Fb證實 不提離開因由

眾志又稱，林淳軒提出退黨申請並獲得批准，由即日起林淳軒已非眾志成員，其未來對外任何行為均與該組織無關。數分鐘後，林淳軒亦喺Facebook留言證實離開眾志，又稱對眾志有太多抱歉同感謝，同時形容尋日都係新旅程開始，但佢隻字不提自己離開眾志嘅因由。

現年二十三歲嘅林淳軒突然退黨消息一出震撼社運界，因為林淳軒同黃之鋒早喺學民思潮年代已認識，一同參與一二年反國民教育運動，隨後就係參與違法佔領行動，以及喺舊年一齊成立眾志，雖然林嘅知名度唔及黃之鋒同羅冠聰，但仍然被視為眾志核心一員。

值得留意嘅係，因應黃之鋒、羅冠聰早前身陷囹圄，林淳軒近月更「升呢」，儼如眾志嘅新大旗手，除咗多次代表眾志對外發言，佢喺九月底更頂替當時正在服刑嘅黃之鋒到英國「唱衰中港」，期間更曾與末代港督彭定康會面。另一方面，雖然林淳軒目前仲係自由身，但之後仍然要面對舊年「佔領西環」事件嘅官司。

網民質疑涉 「穿櫃桶底」

對於林淳軒因違反黨內財政處理程序退黨，有一批網民質疑事件係咪涉及有人「穿櫃桶底」，另有一批網民要求眾志同林淳軒清晰交代事件始末，當中網民Roland Ho話，眾志部分財政來源涉及公眾捐款，該黨有必要清楚交代，「不是沒損失，退出就可完結。」

一句到尾，依家係眾志成立以來最風雨飄搖之時，林淳軒突然退黨肯定影響眾志嘅形象同士氣，加上明年三月立法會補選係咪可以贏番羅冠聰被DQ嘅香港島議席，其實仍無十足把握，眾志會否被打殘，時間將會證明一切。