中環出更：張宇人學樹根 自創成語「雞毛鴿缺」
過往立法會有唔少「語出驚人」嘅議員，當中前議員鍾樹根（樹根）自創嘅成語形象深入民心。樹根過往曾自創「雞毛鴨蒜」，令人百思不得其解，究竟佢係指「雞毛鴨血」抑或係「雞毛蒜皮」。繼「雞毛鴨蒜」後，尋日立法會竟出現「雞毛鴿缺」，今次自創成語嘅係飲食界議員張宇人（Tommy），到底又係乜嘢意思呢？
批政府搞到市民冇啖好食
立法會尋日繼續辯論施政報告致謝議案，Tommy指飲食界現時「雞毛鴿缺」，其後佢自行解畫，話「大家唔好以為我係東莞口音講歪咗，其實我依家係講緊『雞』、『毛』、『鴿』、『缺』」。佢解釋，現時內地冇向本港提供活雞、活鴿同鴨等等。至於「毛」就係指「毛蟹」，亦意指大閘蟹。佢話啱啱供港嘅大閘蟹其實已喺內地做化驗，但港府卻要求再做化驗，令本港市民拖延至今先有大閘蟹食。
Tommy又話「雞毛鴿缺」並非只係業界嘅問題，而係同民生相關。佢話多年嚟都希望政府能夠開闢更多食物供應來源，畀市民有更多選擇，降低來貨價格。但佢批評政府喺有關方面嘅工作卻愈做愈差，近年內地嘅活禽未能供港，依靠內地活禽嘅業界「手停口停」，令市民「冇啖好食」，反問香港又豈能稱為「美食之都」呢？佢建議政府應充分利用本地農場，以紓緩市場嘅需要。
卓妮