中環出更：劉燕卿難搣職業病 去到邊格到邊
金銀業貿易場早前舉行新一屆理監事會就職晚宴，申訴專員劉燕卿（Connie）都有到場。Connie出任消委會總幹事多年，經常教市民要做個精明消費者，佢笑稱由於自己身份敏感，所以買嘢時反而有避忌，唔敢格價或貨比三家，最緊要速戰速決。佢笑笑口話喺消委會做得耐確實有「職業病」，仲將病帶入政府添！
乜嘢病咁大件事？咪就係精明嘅消費文化囉！Connie話做咗申訴專員之後，經常要求同事喺採購時要多啲比較價錢、功能，呢個習慣已經好難改變。講起佢同金銀業界嘅淵源時，佢就話任職消委會期間，不時要處理投資倫敦金嘅投訴，所以經常請教業界，多得佢哋幫手咁話。
陳尚智睇好黃金前景
講到倫敦金騙案似乎屢禁不止，最近又有投資公司利用北韓局勢緊張游說基層或退休者，參與倫敦金投資詐騙金錢。金銀業貿易場永遠名譽會長陳尚智就話，北韓局勢雖然緊張，但係相信唔會打仗，黃金價格亦唔見明顯飆升。不過佢仍然睇好黃金嘅前景，所以如果大家有閒錢，樓、股票同黃金都買啲喇！
金銀業貿易場理事長張德熙、副理事長謝滿全、香港珠石玉器金銀首飾業商會理事長黃紹基等業界老行尊都喺度。謝滿全同黃紹基都係大型珠寶金行嘅高層，雖然黃金首飾畀人傳統、老土嘅感覺，但佢哋話最近打金技術已有突破，原本硬度偏軟嘅黃金，已經可以好似K金咁，做得愈來愈細緻，款式亦唔似以前咁老土，好多後生女仔都鍾意買添！
卓妮