早排前特首出席一個論壇，講起好多與會者個名都有「國」字或「華」字，證明大部分人對中華民族復興充滿冀盼。照咁睇，律政司司長袁國強個名都可謂夠晒愛國夠晒強大，之但係佢老哥嘅表現對唔對得住個名，咁就另作別論囉。
唔係講笑，袁國強喺最新嘅問責高官民意滿意度調查之中，評分再次墊底，比上次調查得分再下跌，位列一眾司長嘅末席，國強不強，都咪話唔冇面。鬼咩，新政府上場已經超過三個月，而袁國強又係上屆過渡嘅官員，係龍係蛇市民早就睇得一清二楚，以佢老哥差強人意嘅表現，得分低處未算低，隨時再創新低嘅咋。
唔係咩，袁國強執掌律政司五年幾，香港發生嘅亂象一浪接一浪，淨係佔領之亂咋，搞到社會撕裂法治蕩然，作為律政司之首，係咪好應該出手撥亂反正呀？係咪好應該將搞手及黑手繩之以法呀？點知佔領落幕咁耐，只有區區九名主要搞手被檢控，包括金主及幕後黑手嘅壹淫媒老闆漢奸黎至今逍遙法外。反觀向漢奸黎擲豬雜嘅義士同埋七警早就鋃鐺入獄，一樣違法兩樣處理，難怪外界質疑律政司大細超，尤其戴妖同袁司長係大學同窗，有人會唔會暗啞抵優待老友，邊度講得埋o架。
呢嗱，最近三名佔中學生領袖先後獲得保釋並批准上訴，其中一位學生領袖仲大大聲多謝袁司長令佢經歷「奇妙旅程」添，點解要感謝，咪就係因為律政司大度仁慈囉，淨係告一條衝擊政府東翼廣場罪咁大把。講真，要多謝袁司長嘅人又點止咁少吖，上至漢奸黎下至一眾反對派政客，都好應該開口道謝。
睇吓長毛咪知囉，收咗漢奸黎黑金臭屎密冚，點知獲司法放生不特止，律政司仲主動放棄上訴添，同咬實陳志雲單畸士唔放有如天壤之別，你話長毛對袁司長唔銘感五內至奇喇。仲有將黑金「袋住先」嘅李呃人等政客，一樣毫髮未傷，唔感謝袁司長又感謝邊個喎。
睇到喇，呢啲就係「口裏說不，身體卻很誠實」嘞。咪睇有人平時把口愛國愛港，其實不時同反對派暗通款曲、眉來眼去，唔知幾friend。香港回歸咁耐亂足咁耐，反對派仲得戚過未回歸嗰陣，家陣知點解喇。
話時話，家陣立法會正辯論施政報告致謝動議，反對派肯定又趁機搞搞震嘞。不過咁，如果致謝對象換咗律政司司長就唔同講法，漢奸黎分分鐘會指示反對派一致支持添，多謝袁司長長期關照吖嘛。所以話啫，袁國強雖然喺民意失分，但喺反對派面前得分，都算有失亦有得吖！