政情：不滿政府漠視漁業訴求 何俊賢退委員會
立法會漁農界議員何俊賢（高佬賢）理應為漁業發聲，但佢就去信退出影響漁業生計嘅「修訂法例以改善船隻航行監察服務及規管海上交通的小組委員會」，竟然撒手不管？高佬賢解釋，話政府對於漁民嘅訴求就乜都話做唔到，佢唔想畀漁民覺得佢有份審議呢條例，於是退出委員會，日後再需要就條例投票時，亦唔會支持。
高佬賢喺退出委員會嘅信件中提到，新航道會影響漁業界嘅生計，但政府不但未能向受影響嘅漁民提出合理緩解同補償方案，處方提供嘅資料亦未有充分反映漁業實際作業空間，部分規管內容亦缺乏諮詢，自己難以繼續審議相關修訂，於是提出退出委員會。
唔想畀漁民誤會有份修例
其後佢接受查詢時批評政府漠視業界訴求，漁民要求分時段、分地區等，政府只係答做唔到，但冇其他建議解決，漁民要求補償等等，官員又話有漁業基金。佢又批評漁業基金同解決呢條航道嘅影響無關，自己唔想畀漁民覺得有份審議呢條條例，因此決定退出委員會。