政情：「新人」何翠萍返立會 周圍搵老細
新一屆政府已埋班，三司十三局副局長及局長政治助理都已「齊腳」。而任職傳媒二十一年、由電台轉行出任財政司司長陳茂波政治助理嘅何翠萍尋日就首次以政助身份現身立法會。何翠萍一到立法會，見到正在採訪嘅舊同事就即刻去「攬攬」，又話好掛念舊同事，但似乎佢唔太熟悉立法會，仲企喺立法會會議廳外嘅「咪兜」位問在場傳媒「扑咪」位喺邊呀？連原本喺立法會嘅「老細」陳茂波去咗食晏都唔知道，周圍去搵佢。
現年四十三歲嘅何翠萍話自己係「有咁上下年紀嘅新人」，只係返咗三日工，卡片都未印好，但同事就話佢應該去立法會行吓，所以佢就去咗立法會。不過，佢對鏡頭似乎仲係唔太習慣，表現得扭扭擰擰，甚為怕醜，又講笑咁話唔好影到佢啲暗瘡，又問可唔可以為照片「美圖」。
馮海容等人都嚟熟習環境
除咗何翠萍，財經事務及庫務局政助楊寶蓮、創新及科技局政助張曼莉、商務及經濟發展局政助馮海容同特首辦特別助理李惠都有到立法會熟習環境。立法會秘書長陳維安更喺立法會一樓閣樓向喺一樓嘅人打招呼，大家以為佢喺度睇熱鬧，原來佢只係搵立法會同事啫。