政情：自由黨青年團 趙式浩接棒做主席
本屆政府有多名問責官員都有政黨背景，其中運輸及房屋局局長政治助理符傳富，原本係自由黨青年團主席，隨着佢加入熱廚房後，主席嘅位置就需要另覓人才，原來富豪趙世曾嘅兒子趙式浩（Howard）已經接任咗主席一職嘞！
Howard話接任呢個職位已有一段時間，因為自由黨都想搵一個有啲年資、對黨亦比較熟悉嘅人出任主席，而自己對於青年工作亦有興趣，所以就答應接棒。
希望搵多啲青年企業家加入
據知，青年團亦會新增一名副主席嘅職位，即共三名副主席，分別負責工商、政策研究同對外事務，前副主席、灣仔區議員林偉文將會「翻叮」再出任負責工商方面嘅副主席。
Howard就話自由黨係工商黨，以中小企為骨幹，希望將來可以搵多啲青年企業家加入，自己唔會戴有色眼鏡睇人，最緊要做到嘢，青年團都係搵熟悉事務同有年資嘅人士出任職位，只要有能力勝任，就會用人唯才。