中環出更：自爆夜潛泳池 羅致光認「犯規」
立法會會計界議員梁繼昌（Kenneth）同勞工及福利局局長羅致光早前都有參加維港渡海泳，佢哋仲曾經喺社交網站上載一齊練水嘅照片。尋日佢哋又喺立法會會議廳外相遇，Kenneth隨即邀約羅致光一齊參加元旦渡海泳，但羅致光就以怕凍為由，請Kenneth「食檸檬」，又話游冬泳要日日落水先會有決心，跟住更自爆曾經試過喺深夜潛入泳池，獨霸泳池暢泳，直言自己「唔係有特權，而係犯規」。
羅致光話曾經試過喺晚上泳池關閉時潛入泳池，自行開池燈暢泳，直言獨霸一個泳池「好爽」，又話如果係冬天就更好，因為凍到「sir sir聲」好「過癮」。佢偷偷潛入泳池係貪玩，但佢冇講呢件事係幾時發生。
怕凍拒參加元旦渡海泳
而Kenneth對游冬泳就興致勃勃，話自己每個禮拜都會游兩次水，仲會沖凍水涼，「訓練」自己之餘又可以環保啲。對於羅致光話怕凍，拒絕參加元旦渡海泳，Kenneth就話着咗保暖衣嘅話，其實唔會太凍。Kenneth所言係咪真，就信不信由你喇！
卓妮