中環出更：與三男共處一室 蔣麗芸有冇損失？
公屋供應遠遠追唔上需求，好多基層家庭仍然住喺狹窄嘅劏房。立法會議員蔣麗芸（Ann）尋日一早就話自己前晚去咗瞓劏房，同對母女一齊住，仲話「煮埋早餐畀佢哋食先返嚟（立法會）啊！」明明一屋三人，應該唔係好逼o架，但原來鄺俊宇、譚文豪（Jeremy）同田北辰（田二少）等議員都一齊住喎。嘩！三男一女共處一室，唔知阿Ann有冇損失？有冇同老公攞定批文先呢？
問阿Ann住得慣唔慣，有冇畀蝨咬，佢實牙實齒話冇，仲解釋係接受社區組織協會邀請，唔係住普通劏房，係有規劃嘅「共享房屋」。佢又話雖然係唐樓有啲舊，勝在方便樓下就係街市，嗰晚同對母女去買餸，整咗三杯雞、蝦仁炒蛋，大家都食得開心！咁同另外三個男人有冇嘈，佢話無喎，大家都好認真咁研究。
同基層一齊住 譚文豪變煮飯公
Jeremy同鄺俊宇一嚟到就幫阿Ann切吓嘢、洗吓嘢咁，成個煮飯公Look出晒嚟！Jeremy煮飯嗰時側邊有個細路女，佢話明顯唔係佢嘅龍鳳B；而背後有個女人，佢亦利申唔係譚太，係「包租婆」。阿Ann即刻認頭，又笑笑口話「你哋幾個今晚未交租」，唔交就斷水唔畀用！至於田二少就乖乖地食飽飯去洗碗，實行分工制。
Jeremy話單位有三間房，三位男士同房，阿Ann就自己一個住。每間房都有一張床或者碌架床，中間有一道矮牆分開，另一邊可以放梳化床或者櫈。嗰晚田二少就瞓下格床，鄺俊宇就瞓上格，咁Jeremy就瞓梳化床。但Jeremy話瞓就幾好，係唔夠長，對腳伸晒出去喎。
卓妮