政府成日宣傳叫人唔好做大嘥鬼，點知淨係公屋入伙，好多租戶重新裝修單位，大量新簇簇嘅鋅盆、灶台、木門直接送入堆填區，唔單止造成環保災難，公帑更加白白倒落鹹水海，簡直罪過。
房委會一五年至一六年喺八個新落成公屋項目進行問卷調查，一共涵蓋一萬四千多個單位近二千五百個租戶，話就話租戶對公屋項目嘅整體滿意度平均超過九成，但只有六成四至八成半租戶會全數保留灶台、廚房洗滌盆、廚房門及浴室門等設施，亦即係話，高達三成六租戶會局部裝修新居，以舊年新落成嘅二萬幾個單位計算，涉及嘅建築廢料數量都咪話唔驚人。而最諷刺嘅係，之前因為設計出問題，大批觀塘安達邨租戶焗住棄置房署提供嘅鋅盆、洗手盆等標準設施，咁啱得咁蹺有關屋邨今次並唔喺調查範圍之內，房委會係咪想整靚盤數，相信唔使多講喇，吓話。
租戶之所以重新裝修，其中一個原因正正就係公屋內部設計不合理。部分公屋單位明明地方淺窄，偏偏喺浴室安裝木門，一打開頂到冚，肥少少都入唔到；有啲單位灶台同鋅盆妨礙安裝煮食爐，廚房又細到放唔落雪櫃，更加係違反人體工學兼反智，咁堅離地嘅設計，只有長期坐冷氣房嘅官老爺至諗得出。
當然喇，即使純粹係新租戶覺得裝修唔啱心水，自己扲荷包大執一番，亦唔代表當局可以翹埋雙手，關人個關。試諗吓，喺出面租私人樓，業主都唔會容許租客將間屋亂咁舞，政府作為公屋業主，又點可以例外？事實上，公屋單位進行裝修，原本有規有矩，涉及結構安全嘅部分唔可以擅自改動，鋅盆、廁所門、灶台等其他設施，亦必須事先提出申請。實際上公屋大大小小裝修工程，十個有九個都冇向當局攞permit，但幾乎從來未聽過有人有手尾跟。
咁都未算，申訴專員公署曾踢爆，有住戶將單位進行大改造，連分隔廚房同廁所嘅磚牆都拆埋，房署闊佬懶理，遲遲唔肯要求將違規單位還原，直至最後發出遷出通知書，業主先至妥協，但前前後後已經擾攘超過兩年，簡直離晒大譜。
對於有關亂象，民間提過唔少建議，好似話房署向準租戶發意向書，然後向有意裝修者發放清水樓；又或者同回收商合作，將有用物資循環再用，只可惜你有你講，官有官當耳邊風，就係咁，公帑繼續浪費，堆填區繼續塞爆，都咪話唔荒謬。
始終都係嗰句︰針拮到肉至知痛，試吓將啲裝修廢料堆晒喺官老爺屋企前，睇吓佢哋仲會唔會事不關己唔嗲唔吊！