明年三月將為四個立法會議席出缺進行補選，被取消議員資格嘅青年新政游蕙禎同梁頌恆似乎無意參與混戰，而劉小麗仲處理緊上訴。泛民主派當中，各陣營都對相關議席虎視眈眈，似乎要靠初選嚟做協調。
近日傳出九龍西同新界東嘅初選備忘錄，計算結果分為電話民意調查同電子及實體市民投票兩部分，各佔五成。但據聞有人喺過去嘅會議上，提出新增立法會議員同區議員嘅投票，佔結果嘅兩成。原有嘅方案或令知名度較高嘅人有利，而新建議嘅方案，就或令某啲低知名度嘅候選人有機會翻身。
根據民主動力所草擬嘅初選備忘錄，下月開始嘅初選。如果用現時嘅方案，知名度較高嘅人會有優勢。喺新界東，立法會前議員范國威、鄭家富就或者會佔優，相反學聯前常委張秀賢或者就冇咁着數；喺九龍西，由於幾位疑似候選人嘅知名度差唔多，用現時嘅方案嘅話就影響不大。
新建議嘅方案其實係參考番○七年立法會港島區補選時所用嘅泛民初選方案。由於新界東有唔少獨立區議員，而且佢哋都有同張秀賢合作，所以採用新建議方案嘅話，張或有優勢。但新方案喺九龍西就未必行得通，事關該區嘅區議員多屬傳統政黨，所以民協馮檢基同民主黨袁海文或會佔優，若真係出現呢個情況，本土派或會「反枱」。
雖然兩個方案各有優勢，但無論技術上、理論上嚟講，兩區所用嘅初選方法需要一致，最後能否達到共識都好難講。