政情：港查反競爭 冇臥底 禁竊聽 冼博崙呻綁手綁腳

缺案例 刑事調查方法少

冼博崙喺九月已履新，曾效力美國反壟斷局十四年、有豐富經驗嘅佢坦言，美國同香港對反競爭行為無論喺調查、程序同角色上都有好多唔同嘅地方。首先係法例，美國競爭法實施多年，法庭上已經有好多成功檢控嘅案例可作參考，而本港嘅法例先喺啱啱起步嘅階段，最缺乏嘅係經驗，需要喺推行嘅過程中不斷累積。

美國同香港喺調查手法上亦有唔同，喺美國一啲針對壟斷嘅調查，相關部門可透過臥底行動、竊聽同線人報料等刑事調查嘅方法展開搜證行動，而以上嘅刑事調查方法並唔適用喺香港，某程度上局限咗本地調查。但Brent補充，美國亦有其他能適用喺香港嘅調查方法，未來會與同事探討引進相關調查方法。

身高1.9米常撞辦公室門框

其實競委會成立至今，被外界批評係無牙老虎，喺調查油價風波一役尤甚，由於競委會報告話未能證明本港油公司有合謀定價，畀運輸業鬧爆。究竟新行政總裁有乜橋扭轉局面？

初嚟步到，唔單止調查方法綁手綁腳，佢亦遇到好多障礙，仲成日撞頭添！點解？入鄉隨俗，Brent起咗個中文名字「冼博崙」，當中嘅「崙」有山峰之意，完全係體現佢逾一米九嘅海拔身高。身材魁梧嘅Brent笑言，目前最大嘅阻礙竟然係辦公室門框太矮，常常撞到頭。真係頭頭碰着框喎。

不過，海拔高並唔代表「離地」，Brent話未來競委會會更「貼地」同市民親近，舉行多啲教育活動同講座宣傳並推廣競爭法，又會喺明年十一月計劃首辦「競爭周」（Competition Week），進行國際性嘅會議，讓多方交流並更好地推廣競爭法。