中環出更：何君堯嘲朱凱廸投錯胎
泛民主派力阻政府提出嘅高鐵「一地兩檢」無約束力議案，立法會議員朱凱廸多次出「怪招」，上周喺立法會大會仲動議根據議事規則第88（1）條「清場」，要求新聞界同公眾人士離開會議廳，建制派議員何君堯日前喺Facebook直播時，嘲朱凱廸「投錯胎」，「以為自己係日本人，或者係喺港英殖民好耐，唔覺得回歸番中國係值得驕傲嘅事情」。
話朱以為自己係日本人
朱凱廸喺過去兩次立法會大會都提出喺回歸後未用過嘅議事規則條文，阻撓高鐵「一地兩檢」無約束力動議。何君堯喺上周四Fb直播，雖讚朱凱廸勤力、講嘢「有層次有point」，惟「用錯地方，偏執咗」、「依家企錯位、諗錯咗」，「佢（朱凱廸）有多少可能……投胎時候投錯咗，可能以為自己係日本人，或者係喺港英殖民好耐，唔覺得回歸番中國係值得驕傲嘅事情」。佢又形容朱凱廸係「螳臂」或「朱臂」擋高鐵，好可惜。
提及立法會嘅議事情況，何君堯強調作為立法會議員，首要係坐喺議事堂開會，「成日唔坐喺度嘅友仔，你記住佢……我間唔中都會去開吓小差，上番自己間房，或者做第二啲嘢，但大部分時間坐喺議事堂開會，係議員職責」，認為議事規則應要有賞有罰。
卓妮