中環出更：家有「中央廚房」王庭聰秋冬好滋補
秋風剛起，天氣開始乾燥，又到滋補養顏嘅季節。唔少政商界名人尋日去馬場觀賞賽事時，都乘機交流煲湯水滋潤嘅心得，雪梨、雪耳都係大家必揀嘅湯水材料首選，唔少人除咗食療，仲會外用當護膚品保濕添，香港中華總商會會董王庭聰話，太太仲會做「中央廚房」，煲湯煮餸畀仔女同五個孫，真係厲害！
王庭聰話秋冬除咗飲黑糖薑茶外，太太間中都會燉下雪梨，依家仔女同佢住同一棟樓，後生就好少識煲湯，太太每朝起身就去買餸煲湯，做一個中央廚房，送湯同餸畀仔女同孫食。王庭聰仲有個秘訣令小朋友唔好淨係食零食，就係限小朋友只可食兩塊餅仔，之後就要食飯嘞，認真有計！
顏吳餘英教煲滋陰湯
香港中華廠商聯合會名譽會長顏吳餘英都話湯水對秋冬最重要，煲雪耳、淮山、無花果、百合就最好，自己一星期會煲兩次，佢仲推介一種用乾鮑、蘋果、無花果、果皮、瘦肉、百合同蓮子煲嘅湯水，相當滋陰，一家大細都適合飲，尤其係啲孫食得煎炸嘢多，就更加重要嘞，平日仲可以煲雪梨蘋果水加南北杏，健康過買果汁，啲孫又鍾意飲。
至於東華三院前總理林李婉冰就話，會煲響螺、雪耳，仲會燉海參同花膠等，水滾起計燉三至四小時，食埋湯渣就更好，雖然電子燉盅唔使睇火，但自己仍然用開傳統燉盅，因為效果最好呀！
唔少名人都內外夾攻嚟補吓o架，好似香港愛馬女士協會主席葉思貝就話，秋冬最緊要喺湯水度加紅棗補血氣，而雪耳木瓜糖水亦相當滋潤，秋冬飲咗對喉嚨好、皮膚都好，除咗食療外，仲要每日做好皮膚嘅保濕，咁先可以應對乾燥天氣，而副主席胡珮君就話秋冬除咗要食雪梨外，朝早要飲下蜜糖，而無論幾忙，夜晚都堅持敷面膜添！
卓妮