隨着全國人大常委會全體會議通過將內地《國歌法》納入香港《基本法》附件三，本地立法程序隨即展開。始終都係嗰句，世不患無法，而患無必行之法，當局有尚方寶劍在手卻畏首畏尾，唔敢嚴懲侮辱國家民族嘅敗類，咁就講乜都嘥氣喇！
係人都知，國歌同國旗係國家主權嘅象徵，尊重國歌唔單止係公民應盡嘅義務以及做人嘅基本質素，更加係國際標準，就算係反對派最戀慕嘅美國，運動員喺播國歌時單膝跪地，表達訴求，結果一樣畀人鬧到反艇。
國歌立法天經地義，引入本港更加係刻不容緩，淨係港足參與國際賽事，噓國歌有之，做不文手勢有之，背脊對住有之，沒有最醜，只有更醜，已經睇見都眼冤；又好似每年「七一」升旗同播國歌儀式，更淪為反對派「行為藝術」嘅場地，長此落去，仲成世界嘅！
唔使問阿貴，國歌法本地立法，反對派政客自不然氣急敗壞，嘈到拆天，有人高呼「愛國毋須規管」，亦有人建議當局以「白紙草案」形式諮詢公眾。呢啲咪冇嘢講搵嘢嚟講囉，「愛國」就梗係唔使規管喇，弊在反對嗰班人逢中必反，路人皆見，管少啲都唔掂。西諺有云︰火雞唔會投票支持過聖誕節。如果唔係本身有心玩嘢，又使乜驚立法吖。咪畀人睇死，就算日後真係立咗法，呢班友都會無所不用其極測試法律底線︰唱國歌走音算唔算違法？起立但反白眼算唔算違法；普通話有「鴨脷洲口音」又算唔算違法，諸如此類，不一而足。真係諗極都唔明，既然有啲人咁鍾意講「公民抗命」、「違法達義」，家陣機會嚟喇，可以繼續玩嘢博光榮入獄，照計應該舉腳贊成立法至係o架！
至於搞公眾諮詢，盞為反對派提供機會搞風搞雨，添煩添亂嘅啫。好似「一地兩檢」咁，明明大部分市民支持，反對派硬係要盲反到底，港府向立法會提交無約束力議案，原本諗住示好，點知對方唔領情，結果又係拉布收場，港產官僚冇理由唔吸取教訓啩？
當然，話又要講番轉頭，外界部分質疑唔係完全冇道理。例如家陣電視台挨晚新聞報道前都會播國歌，喺街行行吓又或者喺茶餐廳食嘢聽到，使唔使起立致敬？呢類實際問題，喺立法過程中應該一併考慮，底線係確保守法市民唔會誤墮法網。
點講都好，國歌立法大局已定，怕就怕當局有法不依，甚至刻意玩放生。咪話唔提醒，包括漢奸黎在內嘅佔中搞手至今逍遙法外，倒插國旗嘅垃圾會議員罰款了事，律政司司長袁國強已經畀人鬧爆，對中央在港落實「全面管治權」「揣着明白裝糊塗」，佢老哥繼續詐傻扮懵，小心睇路吖！