政情：多料議員成日坐 劉業強呻肥咗
立法會不時有拉布戰，唔少議員被迫長時間喺立法會內坐定定，坐得多自不然會長肉。好似多料議員兼鄉議局主席劉業強，雖然只做咗一年多嘅立法會議員，但佢就大嘆肥咗，尤其係個肚腩添！
冇用過立會健身室
劉業強平時要兼顧行政會議、立法會、區議會同埋鄉議局，佢話現時各級議會嘅會議時間都經過協調唔會撞期，所以仍然兼顧得到，但就要犧牲睡眠時間同埋逢星期六嘅運動日囉！佢仲話，自己運動量減少而長肉，仲即場拍吓自己個肚腩顯示無講大話。
話時話，立法會設有健身室畀議員用，佢都可以用嚟減磅啫。劉業強就話未參觀過健身室，而且拉布期間健身會趕唔切沖身。其實健身室過往被指殺氣重，常客多數無法連任，劉業強就話未聽過呢個傳聞，仲大嘆好彩未用過喎！