政情：志切區選 劍指「超級」 葉劉愁覓戰場

料出戰兩年後區會改選

據聞葉劉其實志在參加二○二○年立法會選舉中，有「超級區議會」之稱嘅區議會（二），而出戰呢個功能界別嘅前提係必須為區議員，而且要取得十五個區議員提名，所以就解釋到身兼行會成員同黨主席嘅葉劉，點解唔怕困身都要去選區議員。不過，即使葉劉參選同埋贏得月底嘅山頂選區補選，都要喺二○一九年區議會改選時爭取連任，所以留待兩年後先直接參選確實可以慳啲工夫。

而葉劉咁渴望擴張版圖至超級區議會，相信係緣於該黨前副主席兼雙料議員田北辰早前退黨，導致新民黨喺立法會只得兩席。田北辰於今屆立法會選舉時贏得七萬多票，根基相當紮實，新民黨想喺新西重奪議席並唔簡單。至於九龍西同九龍東又欠缺樁腳，所以葉劉轉戰超區最合理，仲可以騰出佢原本所屬嘅港島區畀第二梯隊。葉劉又可以喺選舉期間，利用超區人氣帶動黨內參加地區直選候選人，呢招確係一舉多得。

首選港島區 靠牙力爭位

若然葉劉真係要參選區選，港島區就係佢嘅首選，因佢過往三屆立法會選舉均循港島區進身議會，今屆更以票后姿態勝出。不過現時香港島四個區議會中，泛民同建制嘅勢力分布幾成定局，而建制派嘅議席亦都早已落入民建聯同工聯會手中，葉劉想落場分一杯羹絕非易事。

現時可供選擇嘅選區實在唔多，葉劉可以向獨立議員埋手，好似身兼灣仔區議員嘅獨立立法會議員謝偉俊，不過呢條路似乎食閉門羹機會大啲，所以葉劉亦都可以考慮從建制派喺今屆失去嘅選區着手，去協助建制派收復失地，好似灣仔區大坑選區楊雪盈、東區丹拿選區鄭達鴻等，趁對手啱啱從建制手中奪得議席，仍未站穩陣腳時去挑戰，勝算應該仲大添！但呢類議席並唔多，相信唔少建制派同樣(目及)到實，到時就要睇葉劉有幾多牙力去爭位出戰喇！