中環出更：回應社會問題 梁昆剛教路「設計思維」
《孫子兵法》不但係軍事書籍，亦被視為「設計思維」嘅經典。香港設計師協會會長梁昆剛（Ron）早前喺社企民間高峰會上分享心得，佢話「設計」其實係一套解決問題嘅方法，而《孫子兵法》教人點樣靈活應對詭譎多變嘅戰爭，正正展示咗古人點樣應用「設計思維」解決問題。
Ron話，近來好多人談論「設計思維」，其實每個人都可以係設計師，就算媽咪喺廚房洗碗，將碗碟由大至細咁洗，跟住層層相疊，呢種節省空間同增加效率嘅做法係運用程序去解決問題，屬於「設計思維」嘅體現。佢話「設計思維」都有助政府制訂政策，至於點樣尋找最恰當嘅方法嚟回應社會問題，就需要同理心與創意喇！
同場仲有香港品牌協會創會主席吳秋全、「長屋科技」聯合創始人鄧子傑、高峰會籌備委員會主席容蔡美碧、青年工業家協會副會長張益麟及廖錦興等人。當日有唔少社企都識得運用「設計思維」回應社會問題，譬如有社企因應香港人口老化，長者生活起居面對唔少問題，於是對症下藥為老人家嘅居所安裝防滑地板或扶手。
梁藹婷幫老師傅開工作坊
「傳耆」負責人梁藹婷眼見好多傳統手工藝，例如霓虹招牌或製作花生糖嘅老師傅都不敵時代巨輪，落得手停口停嘅困境，於是建立網上平台為一眾老師傅開設工作坊、打開銷售渠道，務求傳統工藝得以承傳。難怪張益麟都話，「設計思維」有助實踐創造共贏，值得企業借鑑。
卓妮