美國前聯邦參議員艾弗特‧德克森有句名言︰「我向來堅守原則，而我嘅首要原則就係經常保持靈活多變。」所以幾時都話，同政客講原則，同跟妓女講貞操一樣，都係緣木求魚！
呢嗱，有現成人辦你睇，本港反對派為咗阻撓高鐵一地兩檢議案，喺立法會拉布無所不用其極，除咗不斷要求響鐘點算人數等例牌菜，議員朱凱廸更加使出爛招，引用《議事規則》，動議驅逐所有傳媒記者以及公眾人士，公然踐踏新聞自由，剝奪公眾知情權，是可忍孰不可忍！
班反對派政客平時大仁大義，開口埋口言論自由、核心價值，連「爛果報」畀人抽廣告都要差隻腳埋去管，提出所謂「捍衞新聞自由」動議，家陣為咗拉布，為咗推冧一地兩檢，居然驅逐記者；最好笑嘅係，早排立法會議事規則委員會舉行閉門會議，反對派議員踩場，企圖強行闖入，藉口同樣係保障公眾知情權，佢哋「原則」之「靈活多變」，果然唔到你唔服。
今次呢鑊嘢，將反對派政客嘅虛偽面具一嘢撕破，呢班政棍爭民主為名，搞破壞為實，莫講話公眾知情權，連靈魂同良知都可以出賣，特別係落實高鐵「一地兩檢」安排，加速中港兩地融合，更加係觸動咗呢班逢中必反政棍嘅神經，難怪佢哋氣急敗壞。
可惜吖，今次佢哋踢到鐵板，市民一面倒鬧爆不在話下，連一向同佢哋同一鼻孔出氣嘅記協，都冇法子唔出聲譴責，表示遺憾，可見群情有幾咁洶湧。
大家有眼見，唔理拉布幾乞市民憎都好，反對派點都會搵個冠冕堂皇嘅理由，撳鐘點人數，佢哋可以話齊人開會係議員責任；議案中止待續，又可以賴茲事體大，從長計議，今次趕記者同市民離場又點解釋？反對派話喎，咁做係為咗阻止政府一地兩檢議案，係回應市民嘅期望。喂，十個民調九個都顯示多數市民撐一地兩檢，認同係便民舉措，政客故意顛倒黑白，強姦民意，仲有冇再離譜啲。再講吖，即使市民支持你哋推冧一地兩檢，都唔代表你哋可以黑箱作業，反對派嘅說詞，將佢哋為達目的不擇手段嘅醜陋面孔暴露無遺。
不過都好嘅，經此一役，證明議事規則大有漏洞，好容易被政客利用嚟拉布，損害公眾利益；趁依家民氣可用，加上建制派有票數優勢，係時候畢其功於一役，修例杜絕拉布。至於政府，亦應該丟掉幻想，準備鬥爭，一地兩檢無約束力議案掟上議會，原來諗住伸出橄欖枝以示尊重，點知捉蟲收場，可見所謂「大和解」只係一廂情願。