政情：黃錦星涉違泊 冇被抄牌市民鬧爆
局長落區大晒？環境局局長黃錦星尋日朝早到油麻地咸美頓街附近一帶參觀店舖，有市民發現他隨行兩架政府AM車牌嘅七人車，泊喺畫上黃線停車禁區嘅位置，現場有警員及交通督導員維持秩序，多架違泊被抄牌，但黃錦星嘅兩架車就冇事，質疑局長獲優待，認為應以身作則，遵守規例。
累貨車司機收「牛肉乾」
有輕型貨車司機尋日朝早九時許，將車輛停泊喺現場嘅貨車錶位後半位置，之後離開食早餐，約半小時後返回取車時發現被抄牌。該司機承認違例泊車，收到「牛肉乾」無可厚非，但就見到黃錦星嘅隨行車輛無王管，違泊但冇收告票，認為如非局長出巡，交通督導員不會如此落力抄牌，仲呻話「局長你嚟到累我冇咗三百二十蚊，你自己就施施然違泊，好唔公平！」
環境局發言人話，黃錦星昨早到訪油尖旺區，視察多個地點，並聽取地區人士就環境方面嘅關注。當時隨行車輛停於上址上落貨區，司機都喺現場守候，準備如有需要，可以將車輛即時駛離。