政情：帶「泰妹」出街 鄭松泰呻冇位餵奶

仲搞到佢嘔奶

而作為新手爸爸嘅立法會議員鄭松泰近日就呻，自己有次帶囡囡「泰妹」出街，因為冇地方餵泰妹，搞到要響公眾地方餵奶，最後泰妹仲嘔埋奶添，嚇到鄭松泰之後帶泰妹出街都要做足資料搜集，搵清楚邊個商場有哺乳室。

冀政府做多啲

鄭松泰話，香港部分商場會將換片嘅地方同哺乳室放埋一齊，佢之前帶泰妹行街去嘅港島區一個商場就係其中之一，所以當有家長帶BB去換片時，就會令要飲奶嘅BB冇地方用。而當日鄭松泰就正正因為有人用緊間房，搞到佢要喺公眾地方餵泰妹。

鄭松泰又話，自己已經好少帶泰妹出街，今次泰妹嘔完奶之後就更加唔敢。佢仲話依家出街前要先做定資料搜集，除咗睇吓商場有冇哺乳室，仲要望清楚到底哺乳室同換片嘅地方係咪分開，佢仲希望政府可以喺呢方面做多啲喎。