政情：人大執位富二代不獲寵法律界被祝福
新一屆港區全國人大代表換屆選舉嘅提名期喺本月下旬展開，三十六名現任人大代表當中，料有約十人將會退任，包括基本法委員會委員譚惠珠等六名已公開表明唔會角逐連任嘅女將，於是一批「富二代」就蠢蠢欲動明示或暗示想「替補」。不過，有得選亦未必一定當選，據聞有關方面對「富二代」試圖大舉進軍人大好有意見，特別是對世襲繼承接棒更加係嗤之以鼻，相反對於專業人士就情有獨鍾，多名法律界人士有望「被祝福」，進身國家最高權力機關參與以法治國嘅工作。
距離下月十九日人大換屆選舉仲有一個半月，現任人大代表是留是退開始明朗化，包括全國人大常委范徐麗泰（范太）、立法會前議員梁劉柔芬、經濟學者劉佩瓊等女將已公開表達退意，加上部分人大係「一換一」，即由所屬界別或團體「換人」，換言之，真正公開畀有志者去競逐嘅空缺，預料只有單位數字。
世襲味太濃 履歷唔突出
原本大批「富二代」均放風想染指人大，但最終反應不似預期，有消息指有幸「被祝福」嘅人數寥寥可數，部分「富二代」更已經打退堂鼓。例如之前廣泛流傳現任人大霍震寰會轉跑道，退任人大交棒予同屬霍家一分子嘅香港青年聯會前主席霍啟剛。不過，由於今次有唔少從事青年工作多年嘅「富二代」有意出選，為免因票源相近出現意外戰果，據聞經過再三研判後，霍震寰料會留低角逐連任人大，令霍啟剛披甲上陣機會大減。
據聞「富二代」另一個「死因」就係世襲味道太濃，包括范太嘅兒子范駿華、梁劉柔芬嘅女兒梁穎宇等，預料將會與人大位置擦身而過。而另一批「富二代」則因從政履歷仍未夠突出及全面，預計參選都只能陪跑，為五年後捲土重來累積經驗。
政界「雙譚」料冇懸念當選
至於備受有關方面垂青嘅專業人士當中，據聞法律界屬於大戶，除咗因為反佔中一炮而紅嘅香港中小型律師行協會創會會長陳曼琪外，另有律師會前會長林新強等人，他們將會係人大選舉有力嘅競爭者。而其他「被祝福」嘅政界中人仲有由政協轉戰人大嘅基本法起草委員會委員譚耀宗、以及今年年中先離開政府嘅政制及內地事務局前局長譚志源，預料「雙譚」當選人大已冇懸念。