中環出更：假髮大王快樂養出好健康
香港理工大學旗下嘅總裁協會早前舉行晚宴，由前理事長兼「假髮大王」趙振國及心臟專科醫生姚啟恆向一班企業家分享養生之道。講起養生，趙振國話只係「養生」並唔足夠，應該要「養快樂」，因為兩者係屬於兩個層次，如果一個人成日笑，就會有多啲正能量，身體就自然健康喇。
趙振國仲話，無論做咩運動都好，就算只係行路，日日都應該做四十分鐘運動。佢仲喺現場問有冇人日日咁做，結果舉手者寥寥可數，於是佢就即場教幾招比呢班城市懶人，包括全身亂郁咁原地踏步、踎低起身、深呼吸等，聲稱可以幫內臟做運動，大家都覺得好受用。
陳國民不停試食研新煮具
活動喺協會副理事長馬天聰旗下會所餐廳舉行，協會理事長兼「家電大佬」陳國民（Edward）、副理事長史立德、楊章桂芝及陳啟豪等人都有到場。趙振國笑身形屬於「重量級」嘅Edward營養過剩，Edward就話冇計，事關自己盤生意要不停研發新嘅煮食工具，佢焗住要親身試食，唔可以假手於人。雖然話只係生產廚具而唔係開食肆，但係廚具要煮得好食過人，都要不停試食咁話。
做飲食生意嘅馬天聰就話，餐飲業生意仍然好難做，最大問題係請唔到人。不過坊間不停都有新食肆開張，佢就認為係因為做餐飲入行相對容易，加上食嘢冇得上網食，就好似旅行冇得模擬去玩一樣，所以仲有得做。做旅行社生意嘅楊章桂芝都好贊成，佢仲話，雖然受到網上賣機票酒店嘅行家衝擊，但係以服務為賣點嘅旅行團仲係無可取代喎。
卓妮