政情：陳積志呻入政府似賣身
唔少新班子嘅成員，都需要時間去適應一下咁忙碌嘅生活。民政事務局副局長陳積志早前出席一個公開活動時話，依家一星期返七日，唔單止工時長，仲要晚晚去活動，星期六、日成三、四場，真係好似賣身咁，搞到佢依家冇時間做運動，佢仲話如果政總可以好似立法會咁，有健身房就好啦！
忙到冇時間做運動
陳積志話自小就鍾意做運動，喺踢波方面，就由前鋒慢慢被分配至踢中場、後衞、「清道夫」，最後仲要守龍門，大嘆守龍門好慘，「天氣凍就凍喎，天氣熱又曬喎」，仲會遇到有人剷過嚟添，而中學時代就好鍾意打排球，打到啲手指依家歪晒。睇過吓，真係有啲歪（口架）喎！佢仲話依家已經冇時間打排球，有機會跑吓步都已經好開心，都會盡量爭取時間做吓掌上壓，Plank（平板支撐），要保持健康，惟有食少啲，應酬嘅時候盡量唔食，睇吓咁就算囉！