政情：大口湯倒米畀政府反摑

稱可「先執法後立法」 港府急澄清否認

大口湯尋日接受電台訪問時提到，人大常委會通過內地《國歌法》納入附件三後，《國歌法》就自動成為本港法律一部分，港府法理上可以喺完成本地立法前執法。對於內地《國歌法》本身並冇訂明違法後嘅罰則，大口湯聲稱根據普通法原則，冇寫明罰則嘅刑事行為，最高罰則就係監禁七年，即係仲重過內地依家建議緊嘅入獄三年，你都咪話唔驚。

須知近日有關《國歌法》應否有追溯力嘅爭議，正係緣於中央深知港府落實本地立法需時，隨時會遇上反對派拉布，因此有人認為《國歌法》喺香港嘅實施日期，應該追溯至人大常委會將《國歌法》納入附件三當日起計，而唔係以立法會三讀通過《國歌法》本地立法起計。但因應香港社會嘅憂慮同港府嘅游說，內地最終同意香港《國歌法》毋須具有追溯力。依家大口湯無喇喇又話可以「先執法、後立法」，即係變相將港府之前嘅努力前功盡廢。

果然，大口湯發表有關言論後，多名反對派議員立即如獲至寶，群起攻之，最終迫使港府要喺下午透過發言人澄清，強調當局唔會喺本地立法完成前執法，大口湯今次真係瘀到爆。

查實今次已非大口湯首次公開講錯嘢甩轆。早喺二○一一年，佢喺大埔康樂園間豪宅被揭非法僭建，身兼資深大律師、仲做過大律師公會主席嘅大口湯，起初仍死撐有關僭建物喺法律上獲得豁免，到其後有法律界人士質疑其說法，佢先改口話自己記錯案例。其後東方報業集團揭發佢連番向立法會漏報公司利益，佢又聲稱只係無心之失。最搞笑係二○一五年佢因政改立場問題而辭任立法會議員時，居然再次睇錯法例，連遞交辭職信嘅對象都搞錯咗，辭職都要辭兩次。港府真係應該認真檢討吓，係咪仲繼續畀佢做行會成員幫倒忙！